हिन्दी के लिए 👉यहां क्लिक करें
tareekh ke kirdaron kis baat me tum kam ho
ai shah ke azadaron kis baat me tum kam ho
dariya ho samandar ho tum seep ho gauhar ho
tum marde kalandar ho sehra me guletar ho
tum azme Abuzar ho tum fiqr ke kambar ho
tum hur ka qabeela ho tum jaun ka lashkar ho
ai gam ke alamdaron kis baat me tum kam ho
rasta nahi manzil ho dhadkan nahi tum dil ho
mazloom ke tum hami har zulm ke qatil
insan ki azmat ke har baam me shamil ho
zulmat ke samandar me tum nooh ka sahil ho
matam ke talabgaron kis baat me tum kam ho
nisbat hai payambar se nisbat tumhe haider se
is nisbate maula se tum door rahe shar se
tum aankh milate ho har waqt sitamgar se
jo dard mila tumko salman se boozar se
tum roop wahi dharo kis baat me tum kam ho
Abbas ke parcham se sikhi hai wafadari
aankhon me tumhare hai iman ki bedari
qismat se mili tumko mazloom ki gamkhwari
zalim ke liye ab bhi tum teg ho do dhari
mazloom ke gamkhwaron kis baat me tum kam ho
zainab ki rida tumse karti hai sawal aisa
kis gam me bahate ho aankhon se lahu apna
kya ghar me tumhare bhi paigam mera panhucha
jis deen ke lashe ke kaam aaya mera parda
laaj uski rakho dekho kis baat me tum kam ho
kya dars liya tumne Akbar ki jawani se
kya seekha batao to karbal ki kahani se
mat bahlo khateebo ke alfazo mawani se
mahfooz haqiqat ko rakhna hai kahani se
ai ilm ke meyaro kis baat me tum kam ho
masjid ke muslmano maidan ke bano gazi
tum hur ki tarah mango aik raat me azadi
darbar me zalim ke kyun bante ho fariayadi
sajjad ne jis tarha diware sitam dha di
diware sitam dha do kis baat me tum kam ho
tum nahje balaga ki tafseer me dhal jao
Haidar ki gulami ka andaz to apnao
mazloom ko mat chhodo zalim se na ghabrao
haq baat jo kahna hai sooli pe bhi dohrao
Allah ke naqqaro kis baat me tum kam ho
shabbir ke matam me iman ki hararat hai
ye ain e ibadat hai ye ain e shariat hai
shabbir ke paikar me islam ki nusrat hai
khanjar ke tale dekho qayam jo ibadat hai
maula ke tarafdaro kis baat me tum kam ho
soncho to zara manzar tum shame gareeba ka
ghar jalta tha ran me jab us warise quran ka
pamal tha jab lasha aik besaro sama ka
kirdar magar kya tha us warise quran ka
samjho to samajhdaron kis baat me tum kam ho
pyasa tha labe dariya wo lakhte dile zahra
aankhon se barasta tha gurbat me lahu jiska
wo waqt bhi tha kaisa chhe mah ka ik bachcha
hanthon pe tadapta tha pani ka na tha qatra
us waqt ke janbaron kis baat me tum kam ho
halmin ki sada ab bhi ham se hai yahi kahti
shabbir ki nusrat ki dil me jo tamanna thi
kya ab bhi hai wo baaqi jo chah thi mola ki
aawaz wahi dil ki har sans me hai ab bhi
dahke huye angaron kis baat me tum kam ho
tum rahe sadaqat se iman ki hararat se
kirdare imamat se afkare risalat se
tum shauke shahadat se mola ki inayat se
islam ki khidmat se meyare mohabbat se
tareekh nayi likh do kis baat me tum kam ho
iman hai aazadi hai deen ki bedari
jarrario qarrari hai azme wafadari
himmat na agar hari zinda rahi khuddari
mil jayegi sardari Haidar ki tarafdari
karke jo zara dekho kis baat me tum kam ho
rehan pe sarwar pe mola ki inayat hai
nauhe ki azano me matam ki aqamat hai
sach poocho to dono ki har sans ibadat hai
ai ahle aza tumko matam ki jo dawat hai
muh mod ke na jao kis baat me tum kam ho